中環出更：假期有限黃進達踩線當旅行
就快放暑假，好多學生哥都會把握機會，窮遊外地一段長時間，畢業生甚至會去幾個月旅行才搵工添，至於打工仔假期有限，想放耐啲、去遠啲，就似乎有啲難度嘞。早前喺一個論壇撞到旅遊業議會主席黃進達（Jason），佢話當年一畢業就已經投身社會，冇享受過一個咁長嘅畢業旅行，好在佢嘅工作要經常到外地踩線，為客人搵啲新嘅旅遊點，直頭踩線當旅行咁話。
Jason話，今時今日，要放假兩個星期以上去旅行，睇怕只有剛畢業未打工嘅年輕人，或者去工作假期才有機會嘞，自己有時去外地踩線都要花唔少時間o架，「去南美、又或者上郵輪踩線，閒閒哋都要兩三個禮拜啦」。佢話，期間都唔怕同公司失聯o架，依家科技發達，就算喺飛機或郵輪上，都有WiFi，不過打工仔就慘啲，再冇藉口話收唔到老闆嘅訊息喇。
羅程剛：貪近揀東南亞
同樣有出席論壇嘅中華廠商聯合會青年委員會名譽副主席羅程剛就話，喺香港不論做生意或打工，能夠放到兩星期假已經好幸福，講笑話「放超過兩星期假而又安心行得開嘅話，基本上間公司都未必需要你囉」。佢又話自己家庭第一，點忙都好，每年都要同家人去兩次旅行，不過通常都係東南亞，貪近近哋，十日八日已經好夠玩，唔敢行開太耐咁話。
轉個頭又見到金紫荊女企業家協會副主席鄭燕華，佢話計劃由六月起，放一個半月超級長假。真係聽到都戥佢開心呀，唔通打算環遊世界？佢話，三個小朋友都喺英國讀書，所以同老公飛過去參加小朋友嘅畢業禮，然後一家幾口去歐洲旅遊散心，不過自己六月尾可能有公事跟進，到時就要飛返香港幾日處理，搞掂晒再飛返去會合家人喎。
卓妮