政務司司長張建宗尋日喺網誌話，為咗減少消耗塑膠樽裝水，政府目標係三年內喺公共休憩空間等政府場地，安裝五百部飲水機，令呢啲場地嘅飲水機數目由二千七百部增至三千二百部。不過呢啲飲水機嘅衞生情況一向好差，有民間機構驗出唔少大腸桿菌、金黃葡萄球菌等，仲污糟過屋企坐廁。如果政府懶得監控水質，只識扮嘢裝機谷大條數，又點可能令市民放心飲用呢？
