政情：怕整親兼怕瘀 黃金寶練過先敢跑
香港一代「車神」黃金寶（阿寶）早已退役兼告別車壇，轉為推廣運動，最近就擔任教師體育節嘅體育大使。尋日活動開幕禮上，佢對每個項目都十分有興趣，原來佢樣樣運動都鍾意同識玩，平時少接觸全因怕整親兼怕瘀喎！
問到除咗單車，第二項最有興趣嘅運動係乜？阿寶就笑話自己乜都鍾意玩，憶述細個阿媽幫佢報名康樂及文化事務署嘅棒球班，玩過幾堂都覺得幾好，如果一定要揀第二樣最愛應該係跑步。
全職運動員唔係淨識玩一樣
佢話舊年被邀請首次參加十公里比賽時，啲人成日話「阿寶好Fit，冇問題喇」，其實唔係，跑步同踩單車用嘅肌肉唔同，為咗唔好出醜，所以都要踏踏實實練習一個月先得。佢又解釋，其實全職運動員唔係淨係識玩一樣，只係平時只會集中做專項訓練，對於唔熟嘅運動會擔心發錯力整親，咁就影響自己比賽嘞。