中環出更：廠商會北上 黃偉鴻離隊食蛇失聲
唔少人去到外地都想品嘗吓當地嘅地道美食，香港中華廠商聯合會（廠商會）早前舉辦一個內地考察團，有一晚該會會董黃偉鴻（Ellis）就唔跟大隊去食蠔仔粥，自行坐三十分鐘車去食蛇。事關佢二十幾年前喺嗰頭做生意，經常去蛇店食消夜，今次趁機去回味吓，點知翌日連聲都開唔到添！
Ellis話，當晚唔止打邊爐食草蛇，毒蛇都一樣照食，不過毒蛇就要用火鍋炆。見佢好大膽咁拎住幾條蛇嚟影相，唔通唔怕畀蛇咬？佢就話拎住嘅只係草蛇，唔怕嘅，毒蛇就咪搞喇！佢同朋友淨係草蛇就食咗六、七條，仲用茅台酒生吞蛇膽，話可以清熱毒喎，不過第二朝都係熱氣到失晒聲，為食冇計啦！
吳國安鍾情獅頭鵝
該會副會長吳國安就對澄海嘅滷水獅頭鵝特別鍾情，有一日開餐時仲成功爭到一個鵝頭連頸嚟食，好得戚咁揸住當咪用，勁搞笑。佢解釋話鵝頭同頸好貴，以一隻一千六百蚊嘅獅頭鵝嚟講，頭同頸可以分開賣到九百蚊，即超過成隻鵝嘅售價一半。
今次個團並唔係「美食團」，帶隊嘅廠商會會長吳宏斌講到近年港商多數集中喺珠三角一帶，對部分廣東地區例如潮汕嘅最新狀況並唔清楚，但係舊時潮汕同香港都有好多貿易往來，所以就決定帶團去睇吓最新情況。結果吸引近三百人隨團，係廠商會歷來最大嘅外訪團，該會副會長馬介欽、「耳機大王」楊志雄、常務會董關溢康、會董楊靜及丈夫朱容基等人都有去，陣容十分浩蕩。
卓妮