乳癌單親母 堅毅照顧自閉兒

Edith十年前患上乳癌，化療期間更收到壞消息，當時三歲的兒子確診自閉症。為了照顧好兒子，她放棄了自己事業，辭去日本公司私人秘書工作，當上全職媽媽：「老細叫我唔好走，但我辭職，每個人都可以取代我。照顧個仔，無人可以取代我嘅位置。」從此Edith就全職照顧自閉症兒子，至今快十年了。

學會「有限資源做無限嘅事」

但命運似乎沒有讓Edith有喘息的機會。兩年前丈夫跟她離婚後，Edith成為單親媽媽，令她照顧兒子的壓力更大。雖然辛苦，但視兒子為寶貝的她並沒有因此而放棄。她不但自學製作「公仔飯」，讓原本不愛吃飯的兒子愛上進食，又任由他在牆上畫畫、寫字，也經常帶兒子外出和旅行。

Edith希望兒子能過一般小朋友的生活，但過程絕不易捱。面對經常偷走的兒子，Edith就要金睛火眼看着他：「照顧佢嘅十年，我學識咗用最有限嘅資源做無限嘅事，原來同佢一齊參加一百九十九蚊嘅旅行團，都可以好開心。帶佢去旅行，同佢浸溫泉，當人人都歡天喜地浸溫泉，我只係包住毛巾睇住佢，要全神貫注睇緊佢，萬一佢見我無睇緊佢，佢就偷走。雖然係咁但我都願意，佢開心就好。」

壓力爆煲 主動求助勿死頂

要照顧一個自閉症小朋友，當中的困難，如果不是經歷過的人相信很難領會。十年來，Edith偷偷地流過不少眼淚，每每她發現自己精神就快崩潰、壓力「爆煲」時，她都會主動向外界求助。學校老師、社工、地區支援中心職員、警察甚至醫生，都曾經協助她走過低谷：「有人話社會咩資源都無，真係咩都無？我認為唔係，社會咩都有，但你要自己主動去問、去申請、去排隊，可能有啲要排好耐，但有日你好需要時就排到。」

Edith相信，對於家中有特殊需要子女的父母來說，懂得尋求協助是需要學懂的第一步。以她而言，幾年前主動替兒子申請宿位，到最近終於獲批，令她更具本錢長期作戰：「一星期只見一次就唔得，唔見佢四日，三日照顧佢，都好，有幾日畀我休息。但我都唔會百無聊賴喺屋企，唔能夠浪費自己嘅經驗，走過咁多特別嘅路，我希望能以過來人身份去祝福他人。」Edith笑言，患癌以及接近十年照顧自閉兒子的經驗，令她變成半個癌症及自閉症專家，未來想多讀一個學位，目標是關懷一些自閉症家庭，希望自己的經驗可以幫助同路人。