政情：對政策研究有幫助 顏汶羽決定轉科
做人唔可以一成不變，但點變先會更好？好似立法會前議員陳鑑林（橄欖）嘅徒弟之一、觀塘區議員顏汶羽，最近就突然轉跑道。吓！唔通佢棄政從商？
只係讀書轉科啫！話說佢尋日喺Facebook貼文，話修讀緊經濟學哲學博士課程，但為咗更順利同專心做好政策研究，所以經過周詳考慮，佢決定轉去修讀政策研究博士課程。本來佢已經讀咗四年o架嘞，依家轉科可能要讀多兩年，即係六年先可以畢業。
學識做實證研究沒蹉跎
咁之前讀嘅咪嘥晒？佢唔係咁睇喎，話呢四年學識點樣去做學術實證研究，點樣將理論應用到現實世界度，亦多得兩名教授一直指導佢，等佢呢個無咩學術同數學根柢嘅學生，都可以有機會做到幾個研究出嚟，雖然未必個個有效果可以睇到，但過程令佢更專業咁分析問題。佢希望轉科之後，更加可以提升學術研究嘅水平同政策分析嘅能力咁話。