政情：修逃犯例選主席恐鬧雙胞
立法會修訂《逃犯條例》法案委員會因泛民「拉布」仲未選出主席，建制派日前「出招」反制，要求內務委員會提供指引，委任建制派最資深議員石禮謙出任主持人，褫奪委員會最資深議員、民主黨涂謹申主持會議嘅權力。據了解，不論本周六嘅特別內會上建制派嘅建議通過與否，涂仍會堅持喺下周一召開佢所訂定嘅法案委員會會議，繼續選主席。換言之，如果內會發指引後，建制派開一個會，民主派又搞一個，法案委員會隨時鬧雙胞，勢令局面變得更混亂！
條例未開審，立法會兩大陣營已經開始「鬥法」。建制派早前援引《議事規則》第75（8）條，即內會可就法案委員會嘅行事方式及程序提供指引提出動議。民主派則引用第76（11）條，法案委員會嘅行事方式及程序都由該委員會自行決定，強調內會只係發「指引」，唔係「指令」，委員會唔一定要跟隨。而其實兩條條文屬於互相牽制，第76（11）條有寫明委員會做任何決定前，要依據第75（8）條嘅指引，即是雙方都各自喺條文上「鑽空子」。
泛民明集會 稱非要包圍立會
民主派前日去信內會，認為建制派嘅動議極有可能唔符合《議事規則》或《內務守則》，若然通過及執行，破壞法案委員會嘅合法性，質疑喺未修改《內務守則》前，內會係咪有權向法案委員會發出有關選舉主席嘅指引？係咪可以「欽點」主持人？甚至係咪有權通過建制派嘅動議？佢哋更要求立法會法律顧問協助「釋法」，要喺特別內會前回覆。
兩派料下周各自開會
涂謹申尋日獨自見傳媒時指出，○七至○八年時，民主派亦要求內會向一個法案委員會發指引，當時嘅立法會法律顧問就指出第75（8）條嘅指引，係旨在作一般參考，對委員會無約束力。隨後民主派亦見記者，話本周六發起集會，但聲稱唔係要包圍立法會，仲講明法案委員會唔應該跟隨內會指引喎。
此外，因為涂謹申訂定下周一要開會，令保安事務委員會參觀飛行服務隊嘅活動焗住取消，委員會主席、建制派「副班長」陳克勤就話冇緊要，已請秘書另外安排日期。
建制派人多勢眾，特別內會上定必取得主導權，內會指引勢在必行，即係石禮謙可即時安排會議。民主派下周若強行開會，到底邊個先屬於合法嘅委員會呢？倘當日民主派自己「圍爐」選主席，甚至開始審議法案，政府又會唔會承認？建制派又要唔要出席？問題多如繁星，呢場鬧劇若令台灣殺人案疑犯被「放生」，到底邊個要負責呢？