有一天，阿寶看見阿華低頭使用手機，便提醒他：「阿華，你知唔知長時間低頭會對頸椎造成好大負擔！」阿華回答：「唔怪得我近排肩頸肌肉好緊，仲有少少痛。但明明我已經坐定定，又冇大幅度扭動頸肩，點解都會有勞損呢？」
阿寶解釋：「人的頭部約重10至12磅，如果保持正確姿勢，頸椎負重就相等於頭的重量。但低頭姿勢會令正常呈微彎的頸椎拉直，頭部向前傾60度，頸椎負重會增至約60磅。你試想像下頸椎長時間承受咁重負擔，唔出現毛病就奇啦。」阿華擔心說：「肩頸痛可能係預兆，我的情況會否愈嚟愈嚴重呢？」
阿寶回答：「長時間低頭除咗造成肩頸肌肉僵硬和痛症，長遠有機會令頸椎椎間盤受壓而突出，如果不及時糾正可能壓迫神經引起長期病痛，較嚴重情況更需要接受手術處理，所以頸椎病絕對不容忽視！」阿華愈來愈擔心：「咁有冇改善方法呢？」
阿寶說：「所謂預防勝於治療，最有效的方法當然係減少使用手機或電子產品減少『低頭』機會。其次，睇手機時要保持正確姿勢，手機要拎起保持同眼睛大約同一水平，如果在枱上使用可以利用托架輔助升高手機，盡量避免低頭或彎曲頸脊。當連續使用30分鐘手機或電子產品，就應該做一些伸展肩膊、頸同埋背部肌肉運動。」
阿華鬆一口氣道：「原來唔係咁困難啫。由今日起，我唔會向頸椎疾病『低頭』！」
職業安全健康局
www.oshc.org.hk