為咗規管公園「大媽歌舞團」引起噪音滋擾嘅問題，政府早前提出修改《遊樂場地規例》，但多名立法會議員話修例係方便咗執法，但就批評政府冇規管大媽收「利是」，又無加重罰則，根本無阻嚇力。老實講，依家每次檢控都係罰款千二蚊，啲大媽收「利是」，即係打賞咁多，罰款簡直係濕濕碎喇，甚至仲平過交場租，又點會禁絕到呀！康文署署長李美嫦做啲唔做啲，梗係畀人鬧爆喇！
