政情：印尼點票員過勞死 蔣麗芸促引入電子投票
區議會同立法會選舉投票同點票時間過長屢受批評，而印尼早前舉行嘅總統大選、國會同地方選舉，疑因人手點票通宵達旦，致令二百多名參與選舉工作嘅人員懷疑過勞死，又再觸動議員蔣麗芸（Ann）嘅神經，話投票同點票時間長影響工作人員健康，要求政府縮短投票時間同盡快引入電子投票，以加快點票過程同效率。
指長時間工作似酷刑
香港兩級議會選舉嘅投票時間長達十五個鐘，同樣要通宵點票，而阿Ann早喺一五年已提過長時間投票同點票工作係「酷刑」，而尋日亦話投票時間過長，對工作人員嚟講簡直不人道，加上點票時佢哋需要聚精會神檢視選票，精神壓力極大，勞累之極，不利健康。
佢又以舊年台灣九合一選舉，話選民人數逾一千九百萬同涉及多個選舉，但投票時間只有八小時，令點票工作可及早展開，喺午夜前大部分選區都知道點票結果，所以佢認為香港有需要研究縮短投票時間，以盡早開始點票，同埋應全面引入電子投票。
老實講，政府擬於二○二○年嘅立法會換屆選舉中，喺三個傳統功能界別推行電子點票試行計劃，同埋畀喺投票日因執行選舉職務而無法投票嘅政府僱員提早七天預先投票，睇嚟要全面引入電子投票仲有排等呀！