政情：視愛犬為家人 洪為民：贊成加重虐畜罰則
寵物喺唔少人心目中，都等同屋企人咁重要。香港菁英會榮譽主席洪為民（Witman）尋日出席一個活動時講起，細個時都曾經收養過一隻狗仔，養咗兩三年後，隻狗仔被人偷咗，從此就冇再養過狗，因為原本嗰隻狗仔好似屋企人咁重要，冇其他狗仔可以取代得到。
隻狗被人偷咗好難過
Witman話當年住喺臨屋，隻狗一向好乖，平日出街都會跟實，屋企平日習慣唔鎖門，有一日發現隻狗仔唔見咗，佢就周圍搵，又問吓鄰居有冇見過，點知鄰居話好似見到被人拎走咗，佢當時即刻問鄰居點解唔話佢聽呀？之後都係搵唔番隻狗，佢都好唔開心。
近年經常發生虐待動物嘅慘劇，政府近日亦就修訂防止殘酷對待動物嘅法例增加刑責進行公眾諮詢。Witman都贊成要加重罰則，話呢啲人係虐待一個生命，可能心理有問題，可能日後需要要求呢啲人去睇吓醫生，糾正呢啲問題至得咁話。