政情：委員會查UGL打龍通 林卓廷被質疑無認真睇文件
立法會譴責議員周浩鼎涉喺UGL事件上與前特首梁振英「打龍通」嘅調查委員會，尋日召開閉門會議。消息指，今次傳召作供嘅證人係民主黨立法會議員林卓廷。
據悉，林卓廷喺委員會上，被問到點睇周浩鼎被指按梁振英意見改嗰兩頁紙，會點樣影響立法會對梁振英嘅相關調查，到底係改咗對梁振英有乜嘢好處，定純粹只係技術修訂等問題？林起初話自己冇好認真逐字逐行咁睇，被人質疑後，林就話今日冇好認真咁睇，之前梗係有睇啦！
林卓廷回應話唔能夠披露聆訊內容，但指委員會早前有逐段內容審議，自己當然知道每段內容嘅講法，但唔會逐字對比，由於佢唔能夠披露聆訊內容，現時嘅講法對佢唔公道，因為佢唔能夠回應。
周浩鼎遭動議譴責
立法會早前成立專責委員會調查前特首梁振英收取澳洲UGL公司五千萬港元事件，期間梁被指與時任專委會副主席周浩鼎「打龍通」，周疑按照梁嘅意見修改擬議調查範圍，最終遭民主派動議譴責，並且交付調查委員會跟進。