中環出更：鄧宣宏雁拉線雲港醫療交流獲金刀梁力撐
古語有話：「月是故鄉明」，無論離開家鄉幾耐，細個成長嘅地方永遠係最重要。保良局總理鄧宣宏雁（Emily）就係咁，所以近年開始做好多同家鄉有關嘅嘢，例如促進兩地青少年學生交流或進行扶貧工作。早前喺一個雲南鄉親齊集嘅晚宴上，Emily講起構思緊請本港醫生去雲南山區交流或義診，結果獲前行政會議成員梁智鴻（金刀梁）力撐，即刻個心定晒。
Emily話雲南好多山區嘅醫療比較落後，所以好想推行呢個新計劃，但唔知能否成事，於是第一個諗到嘅就係請教金刀梁，因為佢喺醫學界桃李滿天下。咁啱當晚金刀梁都有到場，佢就話好鼓勵本地醫生去內地交流，醫療技術上嘅交流係一回事，大家進行文化上嘅溝通交流更重要。咁佢仲會唔會去呢？佢就笑稱後生時去過喇，依家要畀番年輕醫生去喎。
周詠琁金鈴趕嚟支持
當晚中港政商界人士雲集，包括香港雲南旅港同鄉會名譽會長莊哲猛、主席伍達天、會長伍碧雁及「雲南紅酒大王」武克剛，仲有Emily老公鄧鉅明、靚女歌唱家周詠琁同「金槌拍賣官」金鈴等人。周詠琁由北京趕返港，獻唱兩首歌後又漏夜飛返北京，至於金鈴當日先至由貴州趕返嚟擔任司儀，難怪Emily猛話好感激佢哋。
講起雲南美食，伍達天笑笑口話每次必定要帶雲南火腿返嚟，形容雲腿比金華火腿更加香，因為油多，所以食到佢嘅身形咁樣喎。雲南嘅菇菌類都好出名，佢就最鍾意食牛肝菌、雞油菌同埋雞棕菌，形容雞棕菌好矜貴，賣到二千幾蚊斤添吖！
卓妮