中環出更：考海關貼士 鄧以海籲多練穿梯
海關近年招聘唔少見習督察，吸引好多大學生投考。海關關長鄧以海尋日出席香港特奧執法人員火炬跑開幕典禮後講起，依家競爭大，考入海關真係唔容易。想當年自己考海關時，覺得最困難嘅項目就係入去學院兩日嘅才能測試喇！
覺得才能測試最困難
鄧以海話，自己考海關已經係三十幾年前嘅事，嗰陣覺得最困難嘅項目就係才能測試，包括領導才能，例如有啲模擬情況畀你帶隊員工作，點樣畀指令等等。佢話呢樣真係唔容易，如果未做過紀律部隊，要去做督導，點樣叫人工作要好有技巧，要發揮到領袖魅力同埋畀到一個清晰嘅指令，令隊員可以跟着指令去做，發揮到自己，又達到工作目標。
講起依家好多人爭相報考海關，佢教路話，考生喺體能方面最易失手嘅係穿梯，其實喺公園都有設施可以練習，所以奉勸考生可以多啲練習，做足準備，千祈唔好睇小呢方面嘅測試，否則隨時會因而唔合格。公園都有設施，即係唔使錢都可以練習到啦，聽落又幾好喎！
卓妮