中環出更：飛機零件凸出急折返 嚇親黃業光
早前有香港飛往上海客機發生被閃電擊中嘅意外，好多商界人士成日都飛嚟飛去，喺飛機上遇到驚險事就自然少不免。香港鐘表業總會（總會）前主席黃業光（John）就講起，二十年前曾經搭飛機由香港出發，點知喺窗口見到機翼有零件凸出，結果架機要飛返香港急降，當時都覺得好驚。
John話，當日飛返香港急降前，因為仍然裝滿油，所以仲要先喺空中放油，真係好驚險。講開驚奇經歷，佢話有次一家大細去羅馬，上咗架的士後要求司機開冷氣，點知被司機趕落車，仲要喺站頭叫其他司機唔好載佢哋，搞到佢哋要匿埋喺餐廳一陣，等站頭嘅車走晒一批，先至上到的士。
梁青華紅雨揸車險被撞
香港中華廠商聯合會青年委員會副主席史昊洺就話，十幾歲時同家人去南非，喺機上突然遇到氣流要急降一百米，坐喺佢隔籬嘅阿妹杯咖啡飛咗上天倒瀉晒，搞到佢成身都係，派緊餐嘅空姐仲驚喇，佢自己個心都離一離，不過佢又冇特別驚，覺得好似坐過山車咁喎。
總會前主席梁青華都話，試過搭飛機去歐洲經過雲層時，震得好厲害，但都唔算特別可怕，反而近日喺香港揸車就有個恐怖經歷。原來早排天文台掛今年第一個紅色暴雨警告信號嗰日，佢揸車去到一條單程路上，前方的士突然急速退後，自己不斷響號，對方一開始都好似聽唔到，差少少就撞到，架的士上面仲載有一家人添，佢同車上嘅太太都嚇餐飽。難怪佢話揸車仲恐怖過搭飛機喇！
卓妮