立法會一向都向公眾提供有關立法會議員嘅各種資料，務求提高立法會嘅透明度。市民只要上立法會網站，就已經可以查閱全體議員嘅個人利益登記冊、議員參與立法會事務紀錄等，而過往重要議案及撥款嘅投票紀錄都可以經立法會網站查閱。不過聽聞立法會秘書處最近就計劃進一步改善投票紀錄查閱方式，令各議員嘅投票情況無所遁形。
現時翻查議員投票紀錄，只能夠根據逐次會議查閱，每次都只能顯示該次會議中處理過嘅議案嘅投票紀錄，雖然有關紀錄都會展示所有議員嘅投票取向，但如果要睇個別陣營同議員嘅投票取向就要靠人手歸類。聽聞秘書處有計劃改善現時呢個查閱方式，會循一次過顯示多項投票紀錄嘅方向去研究，例如允許一次過睇晒個別議員或陣營過去嘅投票紀錄，希望可以用數據客觀咁呈現議會中嘅勢力分布。
呢個方法似乎更容易監察議員表現，又方便作出比較，但由於計劃只係喺起步階段，都未知幾時先可以實行。過去唔少議員都要求政府開放數據，希望能夠推動發展智慧城市，唔知講到開放立法會數據，班議員又支唔支持秘書處呢個計劃，進一步整理投票紀錄，令到公眾更容易監察佢哋呢？