內地平價團逼爆土瓜灣滋擾民居，區內早就怨聲載道。日前一名街坊就不幸被旅遊巴撞斃，有地區組織尋日去意外現場默哀，話九龍城區旅巴數量多到嚇人，擔心五一長假情況仲嚴重，要求政府盡快就內地團設限。該組織代表更話，見過旅巴逆線行駛險釀意外，真係聽到都覺得牙煙。人車爭路係老問題，但負責旅遊事務嘅商務及經濟發展局局長邱騰華好似置身事外咁，咪以為喺啟德郵輪碼頭搵到位搞分流就當做咗嘢，再唔做好規劃，係咪想等多啲人出事先知驚？
