政情：腰痛困擾突麻痹 陳恒鑌的起心肝減肥
立法會中有唔少議員有健身習慣，當中議員張國鈞都算最有成效嘅一個，吸引唔少黨友倣效，甚至搵埋同一個健身教練。議員陳恒鑌（Ben）最近都開始健身，但就自己另搵教練，唔通受唔到高度訓練？
搵埋兩老友互相鞭策
阿Ben就話，張國鈞跟開嘅教練喺港島，佢擔心要維持過海習慣會好容易放棄，所以先選擇地方較近嘅健身教練囉。佢更搵埋兩個老友一齊練，咁就可以互相監督同鞭策喇！佢話，最近三個月已經瘦咗十磅，睇嚟成效唔錯。
不過點解佢忽然咁有決心健身？佢就話純粹因為健康問題，因為早排受腰痛困擾，試過開會時突然感到下身麻痹而立即求醫，結果係椎間盤突出，所以就決心鍛煉肌肉。而近排與家人行咗三個鐘頭山，原本擔心會有排痛，但出乎意料之外無乜痛，睇嚟健身應付腰痛呢個方法有用喇！