政情：政府文件都出錯 冼豪輝被改姓「洗」
中文字博大精深，有時只係差一畫或者一撇，成個字嘅意思同讀音都完全唔同晒。油尖旺區議員余德寶嘅徒弟冼豪輝（Henry）就經常被改姓，由姓「冼」變姓「洗」，就連政府部門都經常寫錯，仲要係連錯幾年都唔識改番。Henry就話已經習以為常，所以都好少同對方糾正，希望人哋會自己察覺喇！
Henry話，呢幾年都收過唔少被改姓嘅信，第一次收到嗰刻仲以為收錯信添。不過佢再望一望封信嘅上款，見到兩位拍檔個名之後，再加上知道世界上冇人姓洗，所以就知道封信係冇寄錯。
好多人都讀錯英文姓氏
唔止被寫錯姓，仲有人讀錯音。Henry解釋話，好多時啲人會望吓佢個英文名，咁啱佢個姓氏英文譯做「Sin（音：先）」，佢以為大家睇到之後就識得讀，但點知有人諗多咗，以為係三角函數「Sin、Cos、Tan」入面嘅「Sin（音：晒）」，結果又係變成姓「洗」，真係冇晒符。佢仲講笑話有小朋友叫佢「洗哥哥」添！