政情：吳錦青媽媽打門球叻 征戰世界多次奪冠
近年愈嚟愈多長者返內地過退休生活，博愛醫院主席吳錦青（David）嘅八十幾歲媽媽都住喺深圳，所以佢每星期都會返去陪媽媽。David形容當地嘅長者社區中心好過香港多多聲，例如佢媽媽鍾意打門球，愈打愈叻，仲參加由當地長者組成嘅耆英隊到世界各地征戰，攞到多次冠軍添！
形容香港場地全球最差
門球係一項多人參與、用槌擊打小球嘅競技體育項目，特別受到老年人喜愛。David就形容門球就好似係「長者高爾夫球」，打親至少需要一、兩個小時，所以好考體能，連佢都打唔過媽媽，事關老人家嘅體能好似四、五十歲咁。
佢又話，香港都有門球，但係受場地所限未算好普及，所以打門球都唔係打得特別叻。佢媽媽都曾經來香港參加比賽，仲形容香港嘅場地係全世界最差添，真係冇眼睇。