政情：海外醫生實習分等級 何仲平受責難或辭任
香港醫學會等組織早前提過豁免海外醫生實習期嘅新方案，原意希望畀醫學界多一個選擇，但方案出爐後先後遭到政府及香港大學醫學院、中文大學醫學院兩大醫學院批評「分等級」，事件連日嚟不停發酵。據消息人士指，有份參與制訂新方案嘅醫學會會長何仲平，因受到各方批評而壓力大增，驚好心做壞事，因而想辭任會長一職。何仲平回覆本報查詢時就話冇計劃辭職，不過若果醫學會因新方案而受到各方責難嘅話，會辭職以示負責任。佢又話，本周四會約見食物及衞生局及兩大醫學院解釋清楚方案，希望可以達成共識。
按新方案嘅建議，海外專科醫生於考執業試後，需綑綁在醫管局工作三年才可獲豁免實習，但若喺大學醫學院及衞生署工作嘅海外醫生，則需在試後工作三年及四年，即係喺醫學院及衞生署工作嘅海外醫生，比喺醫管局工作嘅有更長嘅綑綁期，事件掀起外界爭議。據了解，由於新方案受到政府及兩大醫學院反對，預料醫委會下月八日開會時，都難以取得十七名委員支持通過，變相胎死腹中。
何嘆醫學界彷彿走入死胡同
消息指，何仲平前晚深夜向部分醫學會委員透露，感到心灰意冷，覺得醫學界彷彿走入死胡同。佢早前亦曾向食衞局局長陳肇始講過，覺得好大壓力，自己唔能夠領導醫學界向前走，所以出現辭職的念頭，據聞部分醫學會委員都有勸過佢回心轉意。
解畫望醫生有足夠臨床經驗
何仲平回應時就解畫，唔係因為新方案不獲支持而萌生去意，只係若新方案令到醫學會受到各方責難，就會透過辭職呢種方式負上責任，佢仲形容係「每一個會長都應該做的事」。佢又解釋，兩大醫學院均較醫管局綑綁時間長，只係從事醫學院的醫生同時需要兼顧教學及研究工作，定義相關年期的目的，係希望每位醫生獲得足夠的臨床經驗，完全冇「低人一等」嘅意思。佢強調，相信兩大醫學院院長都係通情達理的人，即使未必接受方案，但都會理解新方案嘅原意。唔知港大醫學院院長梁卓偉理解完之後，又會唔會接受呢？