中環出更：梁美芬即席測試 機械人答非所問
好多人都擔心香港科技落後，就連立法會長三角訪問團，都特別去咗上海證券交易所，睇到嗰度直程有機械人識答問添。有份參加嘅立法會議員梁美芬特別試吓問嗰個機械人問題，點知機械人有啲答非所問，似乎都未算極度先進，大幅超前香港。唔知有份隨團嘅財經事務及庫務局局長劉怡翔同創新及科技局局長楊偉雄會唔會鬆口氣呢？
何啟明：上交所係港重視嘅對手
好多議員一見到機械人，都忍唔住要合照。其中，梁美芬就喺社交網站話，問過上海證交所嘅機械人，今日係咪要幫大家賺大錢，點知個機械人答佢唔需要錢，因為上海證交所係包吃包住。隨團嘅議員覺得好幽默嘞，仲一齊笑添。機械人就似乎未夠醒，有啲答非所問，但另一議員何啟明就喺社交網站話，上海證交所嘅無紙化同規模，都係香港一個重視嘅對手喎！咁又係呀，科技呢啲嘢，不進則退o架啦！
梁美芬仲話，平日喺立法會忙到抖唔到氣，嚟到上海先可以同同事輕鬆合照。聽佢咁講，真係令人忍唔住諗起，如果今次泛民冇甩底，可能成件事就更完美嘞！
卓妮