中環出更：人工智能當道 沈祖堯：做護士好過醫生

沈祖堯話，依家已有達文西機械臂輔助醫生做手術，機械臂可以去到人睇唔到同掂唔到嘅部位，將來機械人將更勝人類，因為機械人唔會老得滯手震或眼花，又唔會因為太攰要飲咖啡。咁將來仲需要醫生嗎？沈祖堯笑笑口話，都要嘅，仲要醫生簽字、孭鑊吖嘛！佢又話，將來醫生最大作用就係捉住病人隻手，安慰話：「你無事嘅、無事嘅」，佢風趣嘅言論引得哄堂大笑。

李德麟想試吓AI無人酒店

上海總會理事長李德麟、副理事長張宗琪同埋立法會前議員丁午壽都有到場。負責籌辦今次講座嘅青委主席高鼎國及常務理事鄭肇銘見現場反應咁熱烈，都覺得鼓舞，話希望講座系列可以凝聚年輕人，對總會及家鄉更有向心力。

講起AI，內地已有無人超市及酒店，不過現場好多人都話未去過。李德麟話，若有機會都想試吓。佢細佬李德楨就話，如果有得揀，都係想住有人服務嘅酒店，因為佢呢一代人鍾意熱鬧啲，好似佢爸爸李和聲已經九十幾歲，都仲要經常出來同老朋友聚會，做人先開心啲。

沈祖堯（右二）在講座上妙語連珠，高鼎國（左二）、鄭肇銘（右一）及傑青曾詠恆（左一）都聽得入晒神。（溫國佳攝）

張宗琪（左）同李德楨（右）都未試過住無人酒店。

卓妮