立法會修訂逃犯條例嘅法案委員會喺上周首次開會，搞咗兩個幾鐘都無法選出主席。盛傳會出任主席嘅議員謝偉俊（Paul）尋日喺電台坦言，擔心下次會都未選到，更形容自己好似二戰時諾曼第戰役嘅登陸士兵，有「戒慎恐懼」感覺，擔心一落船就畀人射死。隨着台灣兇殺案疑犯喺香港所涉嘅案件快將完結，疑犯一旦獲釋，即係失去咗可催促開快車修例嘅最大理由，就算Paul選到主席，都要等保安局解畫點解仲要急住修例，所以做呢個主席都唔係咁着數咋！
