政情：內地考察團泛民甩底建制鬧爆
立法會有幾十個議員，隨時有幾十種唔同嘅意見，所以立法會搞每個考察團，行程跟邊個意見都要各有取捨。立法會長江三角洲考察團尋日出發，七名已報名嘅民主派議員全體缺席，建制派就鬧爆好多行程係為佢哋度身訂造，例如譚文豪話要去睇飛機製造廠，葉建源就話要去復旦大學，點知雙雙甩底，嬲到副團長葛珮帆（EQ）話，下次泛民要求去邊就未必將佢哋嘅要求擺咁高啦！
去年嘅內地考察團泛民都有參與，大家原本打算今年搞多次淨係睇經濟、民生嘅長三角考察團，隨團仲有政制及內地事務局局長聶德權、創新及科技局局長楊偉雄同埋財經事務及庫務局局長劉怡翔等多名官員，團長由立法會主席梁君彥擔任，四個副團長就係四個事務委員會主席。點知臨出發前，七個泛民集體甩底，搞到建制派都唔係咁開心。咁又係呀，訂晒啲嘢又唔去，同訂咗枱甩底要人埋單有咩分別呀？
行程度身訂造 反口損立會聲譽
EQ話泛民臨時甩底，覺得好可惜，今次部分行程係為佢哋度身訂造，希望反對派唔好「逢中必反」，扭扭擰擰，話去又唔去，將政治凌駕於民生同經濟發展之上。佢又呻話，辦一次交流團涉及好多協調，臨時甩底係唔尊重各方，亦影響立法會聲譽。下次再搞交流團，泛民提出去邊啲地方會特別小心處理。
林健鋒：咪淨係去外國唱衰香港
身兼行政會議成員嘅立法會議員林健鋒（Jeffrey）都話，今次有部分行程係應泛民要求安排，有啲項目一般人難以考察，立法會議員應該放眼整個世界發展，唔應該成日喺議事廳爭拗，都唔係淨係去其他國家唱衰香港，應多放時間去了解國家發展。梁君彥都話，整個行程安排冇政治意識，質疑泛民點解去其他地方考察就人人去，但到內地考察就着眼係咪涉及政治，希望大家政治還政治，實際民生嘅嘢都要專注去做。
聶德權都對泛民唔跟感到可惜同失望，泛民多次提到唔好將今次安排政治化，今次亦純粹係事務考察，唔應該以政治方式影響安排及效果，又批評喺涉及內地同香港嘅議題上，泛民睇法較南轅北轍，應要思考喺一國原則下如何落實兩制，實踐一國兩制中，中央同特區唔應該係對抗關係，亦唔應該因為睇法不同而影響交流咁話。