中環出更：政府照辦煮碗 再推反面吉祥物「匿獅」
近年政府以「軟功」推政策時經常自製吉祥物，但就由以往大推正能量，改用反面教材為主。繼環境局「大嘥鬼」廣受歡迎後，政府最新力作就係衞生防護中心推出「匿獅Lion」（匿獅），以鼓勵市民多做運動。據悉大嘥鬼做得好，皆因政府外判宣傳工作，自己懶得做，今次似乎係食髓知味，諗住照辦煮碗就算數！
諧音Lazy 同大嘥鬼埋堆
衞生防護中心透過推動「郁一郁健康啲」活動，提醒市民多做運動保持身心健康。而匿獅就係一隻肥嘟嘟又眼神呆滯嘅獅子，其名字包含粵語「匿埋」同英語Lazy諧音，兼取躲藏與懶惰意思，好似香港人一樣鍾意喺屋企休息同玩智能手機。衞生防護中心高級醫生李嘉瑩承認係刻意將匿獅定為反面教材，以塑造有感情嘅吉祥物，畀市民覺得佢好似家人一樣。
另外，卓妮亦發現，匿獅其實一早已經同大嘥鬼「埋堆」，拍片宣傳走塑盡量唔好買外賣，鼓勵市民去餐廳食或自備外賣器皿，同時呼籲大家要「郁一郁」。其實推動政策有好多工作可以做，班官員閒時唔偷懶，多啲視察民情，咪再紙上談兵，又使乜搞咁多嘢形象工夫啊！
卓妮