中環出更：屋頂滲水冇得整陳振彬買過間
漏水一向係家居常見嘅問題，如果解決得唔好都好令人頭痛。卓妮同幾位城中名人傾開呢個話題，觀塘區議會主席陳振彬都話，十幾年前住喺頂樓時，試過隔籬屋裝天線時鑿穿屋頂，連累佢屋企漏水漏到成屋都係，最後索性買過間屋搬喎。
漏水就買屋搬？政制及內地事務局前局長譚志源聽完笑佢「幾寸呀！」陳振彬就解釋話，一出事就叫咗隔籬屋整，但係整極都整唔好，忍咗四年都搞唔掂先至搬（口架）！佢又奉勸大家，千祈唔好鑿穿屋頂，唔好喺屋頂打釘，原來一穿咗係冇得整嘅。今次鄰居仲拒絕向佢賠償，認真損失慘重。
大埔區議會主席黃碧嬌同樣受過滲水困擾，試過樓上洗衣機冇駁落去水喉，排唔到水，連累佢廁所牆滲水滲到有條水柱咁。佢試過淨係整自己屋企廁所，點知樓上又再搞到佢屋企滲水，令佢心情好差。最終佢搵人驗水後，樓上都配合起晒地磚、鋪防水層等，搞咗兩年終於搞掂。
陳家珮瞓覺捱渠臭
同場仲有沙田區議員招文亮及南區區議員陳家珮（Judy），Judy就話未試過屋企漏水，但最近佢都好慘，因為樓上有條氣喉裂咗，穿落自己個單位，搞到有一陣渠臭味，依家要長開抽氣扇，再加上用香薰雙管齊下頂住先，否則就瞓唔到。佢話搵過師傅上嚟睇，建議佢封咗條喉，預計千幾蚊都搞得掂嘅。同師傅傾實後，就會通知樓上個單位做呢個小工程咁話。
卓妮