政情：楊志雄攞好意頭 撐切燒豬習俗
逢親有喜慶或開張等場合，例必有切燒豬儀式，但早前城市大學動物醫療中心開幕時搞出個大頭佛，將切豬嘅相擺上網後惹來網民諷刺係殺動物，搞到校方拿拿聲下「禁豬令」。早幾日喺一個開幕禮上，見「耳機大王」楊志雄（Johnny）喺儀式完咗之後都唔肯走，原來係要等主人家切完燒豬，食幾塊攞個好意頭。
燒肉一樣殺生 除非用齋拜祭
Johnny認為，切乳豬並冇問題，事關呢個民間習俗由來已久，目的只係酬神以求平安大吉同事事順利，唔使將件事放大。佢仲話，如果唔切乳豬，用燒肉或雞取代就冇問題咩？一樣係殺動物喎，除非用齋嚟拜祭啫。
問佢平時有冇切乳豬全體嘅習慣，Johnny就話有，例如農曆年尾收工前會切一隻燒豬，然後每個夥計都送一啲，等大家過年開心啲。過完年開工前又會劏一隻，祈求開工大吉咁話。