政情：甘文鋒再下一城 任亞洲唯一飛躍道裁判
屯門區議員甘文鋒去年尾遠赴多哈學極限運動Parkour（飛躍道），最近就再下一城，考到Parkour嘅國際裁判牌，呢項新興運動全球暫時只得十名國際裁判，十人當中更只有佢呢個亞洲面孔，聽落都幾威。
甘文鋒就話，之前去學Parkour係為咗向香港體操總會交報告，事後總會反應正面，想了解更多，佢就覺得最直接嘅方法係考裁判牌。而佢考到牌後，已率先擔任成都舉行嘅世界賽事嘅裁判，未來仲有兩項國際賽事，去唔去到就要睇下工作情況再決定喇。
彈網牌意外「肥佬」
其中甘文鋒先後考過五個國際裁判牌，包括彈網、男子競技體操等，可以話有鋪考牌癮。但佢目前只剩番Parkour一個牌照，原來佢最愛嘅彈網牌竟然意外考試「肥佬」唔合格。甘話，因為有幾份試卷，佢以為唔得嗰份就合格，但本身有信心嗰份就竟然失手，睇嚟係溫書重心太側重一面所致喎。