政情：麻疹肆虐 袁彌昌唔帶囡囡出街
早前麻疹肆虐，疫苗供不應求，令唔少幼兒家長都擔心中招。新民黨前政策總裁袁彌昌（Derek）同立法會議員容海恩嘅囡囡今年一月出世，依家都約三個月大喇。初為人父嘅Derek都好謹慎，話傾向唔帶囡囡出街喇。
Derek又話，好彩麻疹疫情集中喺機場出現，估計平日出街受感染嘅機會較細。不過，早排佢媽媽翻查其針卡，發現「七十後」嘅佢只係接種咗一支麻疹疫苗，有別新一代打齊兩針，所以佢就成日留喺屋企，估計咁樣應該唔會感染。佢仲話，現時麻疹疫苗一針難求，自己冇理由去搶埋一份。
Derek：企業防疫意識不足
對於有家長主張唔打疫苗，Derek就認為任何疫苗都有副作用嘅，有啲外國人成世只留喺家鄉、唔會出國，唔接種疫苗影響唔太大，但佢認為，為自己着想，都係打齊比較穩陣。佢覺得，今次香港出現麻疹疫情，有啲企業嘅防疫意識唔多夠，忽略咗孕婦健康咁話。