政情：兩女鄉頭創歷史 陳月明唔覺難

陳月明話，雖然已經做咗三屆村代表，但今次做埋鄉頭，都好開心，仲話難得喺人生中創造咗歷史咁話。

對於未來要喺男性佔據大多數嘅鄉事派工作，甚至要領導一個鄉，佢會唔會都有啲擔心呢？陳月明就話唔覺得有困難，可能因為自己都喺圍村長大，同一班叔父相處得好好，加上自己識講客家話，所以同鄉民相處同傾偈亦完全冇問題，仲好開心添。

黃秋萍：易啲同人打開話題

陳同黃秋萍都係女鄉頭，陳就話同黃早喺開會前已有交流，發現大家有好多共同話題，兩人嘅性格都好似。黃就話，初次開鄉議局執委會，感覺非常好，作為女鄉頭，仲有機會容易啲同人打開話題喎。