政情：暫停會議惹泛民不滿 盧偉國被嘲做埋官

話說工務小組委員會尋日開會，點知就同隔籬會議室嘅另一個法案委員會撞到應一應。由於該法案委員會係首次開會，需選出正、副主席，所以喺工務小組會議一開始，盧偉國已宣布暫停會議，直至隔籬會議室嘅法案委員會選出主席，工務小組先至復會。

郭家麒斥耗公帑 不尊重議員

當時唔少民主派議員都反對，其中議員郭家麒就話，都唔知道另一個會議需要花幾耐時間先選到主席，認為盧嘅決定係虛耗公帑、同極唔尊重議員，盧應該同該法案委員會作出提示同協調。盧就反駁，立法會有多個會議室，同一時間有兩、三個會議進行係司空見慣嘅事，如果因為工務小組要開會，就反對其他會議召開，做法並唔恰當。

郭家麒聽完盧偉國解釋後都未收手，仲問議員呢個安排係咪令佢哋嘅工作不受尊重。盧聽罷隨即表明議員係唔需要回應郭嘅問題，並要求郭就議程進行提問。不過盧嘅說話就引起一眾民主派議員不滿。郭仲話︰「盧偉國主席我唔係問你，你幾時做埋官？你不如去做公務員啦！」同屬民主派嘅議員區諾軒亦加把口，大喊︰「佢（盧偉國）次次都做官啦！」其後郭再點名要求在席嘅發展局常任秘書長（工務）林世雄回應其問題。林就話，每逢星期三都預咗嚟立法會工務小組委員會開會，一切都係跟主席安排。

擾攘15分鐘 小組會議始暫停

結果工務小組個會議開波擾攘咗十五分鐘，先至真係暫停到，由於法案委員會因民主派拉布未能選出主席，盧就喺工務小組原定嘅會議結束時間前十五分鐘宣布復會，點知民主派議員就拉布。議員范國威質疑盧更改決定，要求佢講清楚，議員鄭松泰亦提出規程問題。結果有關農業園項目最終就無法表決，要留待下次會議再討論喇。