中環出更：議員考察團恐撞會 陳振英或去唔成
立法會長江三角洲地區考察團原定於下周日（21日）出發，下周三（24日）回港，不過本身打算去嘅金融界議員陳振英（Ronick）就可能去唔到喇。點解﹖因為立法會嗰段時間或者會加開會議。Ronick話，如果考察團真係「撞會」，佢就可能需要留港喇。
立法會《二○一九年逃犯及刑事事宜相互法律協助法例（修訂）條例草案》委員會尋日開會，但因為民主派「玩嘢」，莫講話審議法案，委員會主席都未選到。由於下次會議日期將由法案委員會內最資深嘅議員、民主派嘅涂謹申決定，建制派有人就擔心民主派會再玩嘢，喺考察團外訪期間嚟開會。
「浪費公帑要負責任」
建制派就此開會討論，考察團如果真係「撞會」，佢哋可能大部分人都會留港，改由冇參加有關法案委員會嘅數名議員出訪。
Ronick坦言，如果原本二十二名建制派議員出席，變成得幾個出席，咁就唔好睇喇，而且已經畀咗訂機票同酒店嘅錢，呢啲都係公帑，認為「玩嘢」嘅議員要負起責任喎。
卓妮