中環出更：支持慈善 曾國衞撐保良局活動

當日活動係保良局董事會交代就職典禮，去撐場嘅有曾國衞之外，當然仲有佢哋嘅董事會成員，包括新加入成為總理嘅「九巴金公主」伍穎梅（Winnie），佢仲孖住另一總理何許頴嘉（Candy）傾偈。

致詞落大雨 馬清楠：天降甘霖

Winnie話，佢加入保良局係因為有學校、老人院等，覺得服務夠晒廣泛。而保良局來年計劃開設「保良局專業教育書院」，為幼稚園教師或有志從事幼教工作嘅人士提供課程。講起讀書，Candy就自爆自己喺加拿大讀書時都曳過，曾經因為逃學而要見家長，當時喺美國嘅爸爸仲要特登飛去加拿大，好彩爸爸媽媽覺得事情已經發生咗，都冇特別怪佢，只係同佢傾吓，不過之後就幫佢轉咗間管教嚴啲嘅學校喇。

主席馬清楠新上任，佢太太同三個仔女都齊齊到場支持，相當溫馨。雖然落大雨，但佢致詞時就大讚「天公造美、天降甘霖」，事關水為財，希望善款都可以滾滾而來喎。佢又話，好多人都以為保良局財雄勢大，其實保良局只有兩幢收租物業，而且服務又多，涵蓋人生每個階段，由於希望服務收費平啲，所以善款對佢哋嚟講真係好重要咁話。

卓妮

馬清楠（中）有太太（左二）同兩個女兒Anne（左一）及Katie（右一），以及兒子William（右二）支持佢。

伍穎梅（左）同何許頴嘉（右）都有出席交代就職典禮。