政情：八網難逃：藐嘴自拍 顏汶羽變哨牙羽？
早前堅尼地城海濱長廊開幕，喺欄杆擺上色彩繽紛嘅毛公仔，身兼海濱事務委員會委員嘅觀塘區議員顏汶羽已搶先去打卡，早幾日佢又去咗另一個地方打卡，仲扮哨牙珍添！
到動漫海濱樂園打卡
動漫海濱樂園已經成為灣仔嘅地標之一，早前樂園第二期開幕，顏汶羽急不及待喺社交網站Facebook貼文，話樂園第一期嘅動漫卡通人物已吸引到好多人嚟自拍打卡，睇嚟第二期呢幾十個新公仔，又可以吸引多啲人嚟嘞！
講到打卡，佢當然唔執輸，分別同多個動漫卡通人物合照。其中一張係佢扮埋哨牙珍咁單起隻眼、藐嘴，好搞鬼，雖則佢冇哨牙珍咁有排大哨牙，但啲表情都有幾分神似嘅。唔知之後有冇人會改口叫佢「哨牙羽」呢？