政情：瘦到唔夠力打波 吳永嘉自我谷肥
立法會議員吳永嘉（Jimmy）出咗名熱愛打羽毛球，打起波嚟真係唔講得笑，每一拍都十分有力。佢嘅身形一向都瘦瘦哋，但係最近見佢肥咗，仲有個小肚腩，褲頭有啲勒住勒住咁，唔通掛住食，懶做運動？
仍堅持唔食飯
Jimmy就好自豪話係專登增肥，皆因舊年年底打波時發現自己唔夠力，原來係瘦到冇晒肌肉。過去十幾年佢都唔食晚餐，近排就開始食番，但仍堅持唔食飯，結果肥咗三磅左右，維持喺一百四十多磅嘅「標準身形」，有排都未追得番以前成一百九十幾磅嘅肥仔身材。
另外，Jimmy舊年「嫁」入某政黨，至今五個多月，問到習慣有「家室」未？佢笑稱都係多咗應酬同終於試咗扑咪做回應，感覺幾好。不過，據聞Jimmy答應入黨前講明無乜嘢唔好搞佢，黨團會議慣常喺朝早八時半舉行，佢都唔使次次出席，有話係司機未返工冇車去開會喎。