政情：去印度冇打防疫針 莊偉茵無驚過
香港人愛旅行，如果去衞生環境較差、疫症較多嘅地方，都會打定防疫針以防萬一。不過中電企業發展總裁莊偉茵（Quince）最近去印度公幹時，就冇打過任何防疫針，仲話自己唔食街邊食物、飲樽裝水就得喎！
治安差老公唔擔心
印度嘅治安差係另一個問題，唔知Quince老公會唔會擔心？點知Quince話，以前任職航空公司時，去過晒好多唔同嘅地方，所以老公都慣晒，完全唔驚，仲講笑話老公可能心諗：「好啊！唔好返嚟喇！」講笑還講笑，Quince都提醒話，喺印度千祈唔好一個女人單獨出街，就算約咗當地導遊都要時刻提高警覺咁話。
講起旅行嘅驚險之最，Quince話有次由美國經加拿大轉機返港時，唔知加國已落實電子簽證，結果要即場上網處理，好在最後都搞得掂。佢話如果撞正手機壞咗或冇網絡，錯過航班咁就大鑊喇！