中環出更:區議員開會嗌交 龐愛蘭家規侍候

不時會有議員因為立場問題喺議會內嗌交,有時候疊晒聲真係好難處理。好似二月底沙田區議會轄下嘅發展及房屋委員會上,有兩位區議員為噪音問題嗌交,委員會主席龐愛蘭(Scarlett)尋日講番件事,坦言當日真係好嘈,覺得大家都係成年人,應該要冷靜吓,後來佢仲搵到「家規」,下次可以趕佢哋出場應付咁話。

有權趕議員出去

回帶當日委員會會議,區議員許銳宇話有組織成日搞歌舞表演活動嘈到街坊,要求房屋署正視問題,區議員黃宇翰就話已有法例規管唔使再討論,兩人講講吓變咗鬧交。Scarlett話,當日喺兩人嘈交期間,曾經向助理民政專員查詢,到底有冇規定可以趕議員出去?當時專員擰頭嘆冇,話得立法會先至有。

Scarlett隨即宣布休會五分鐘,期間攞起份《會議常規》刨書,結果畀佢搵到可以趕議員出去嘅依據,笑言自己差啲成為首位趕人走嘅區議會委員會主席,好在當時已經休咗會。如果佢趕議員出場,會唔會畀佢哋入番去?佢就話會,因為趕出去都只係想佢哋平心靜氣諗吓先,啖氣過咗咪得囉!

卓妮

第一手消息請下載on.cc東網iPhone/iPad/Android/Windows Phone Apps