政情：公民講場：學校管治醜聞不絕 楊潤雄死撐監管足

香港教育制度奉行校本管理，由學校主導校政，不過唔代表教育局可以咩都唔使做。近日教育界先後爆出有學校遊學團帳目不清、教師疑因工作壓力喺校園墮樓身亡事件，社會各界仲鬧爆教育局冇做好監管角色。教育局局長楊潤雄尋日喺立法會財務委員會特別會議上，就被議員就有關問題連番追問。楊回應時話，監管學校唔係每次都要大鑼大鼓講，靠傳媒報道嚟判斷係咪監管失效，對當局亦唔公道喎。如果當局嘅監管係做得好，就唔會接二連三爆出校本管理醜聞，依家正正就係當局監管不力，靜雞雞解決唔到問題，先畀傳媒揭發出嚟，楊仲死撐，真係抵鬧喇！