政情：百忙開芭蕾舞校 王凱曼圓夢
好多人投身社會工作後就將細個學過嘅才藝或嗜好擺埋一邊。香港鑽石總會常務理事胡楚南嘅新抱王凱曼（Carmen）幾年前獲老爺委以重任，打理家族珠寶金行，又要湊兩個囡囡，忙到飛起，不過曾經係專業舞者嘅佢仍然不忘初心，最近就開咗一間芭蕾舞學校，自己仲間唔中去上堂添。
上堂操練基本功
以為Carmen去上堂係做老師？原來佢係去做學生。佢話因為太耐冇跳舞，就算係一路跳開舞嘅人，跳舞前都要操練一套基本功，例如扶把、蹲、跳等，要練好肌肉同埋平衡力後先可以跳舞。Carmen又笑笑口話，咪話自己好耐未試過完完整整跳一隻舞，就算依家只係練基本功，條氣都喘唔過來添。
咁忙都要開芭蕾舞學校，原來係因為呢個係佢嘅夢想，更重要嘅係可以鍛煉小朋友嘅毅力喎。佢話時下港孩太幸福，好多嘢可以靠家長教或自己學，唯獨「毅力」係無法教嘅，要靠自己去經歷，而學跳芭蕾舞嘅過程就係一個好好嘅訓練，令小朋友學識咩叫做堅持。