政情：自爆做過小販 郭振華教整雞蛋仔
雞蛋仔、格仔餅等街頭小食陪伴唔少香港人成長，香港工業總會主席郭振華亦都一樣，佢仲自爆有做小販嘅經驗添。尋日佢出席活動時突然技癢，於是就即場獻技，教大家點樣整出一底好食嘅雞蛋仔。
郭話以前食物選擇唔多，就算係街頭小吃，都已經食得夠滋味，而佢就覺得以往食物味道較甜同香，味道更好喎。佢又話以前住過徙置區，唔少鄰居都係小販，佢間中都會幫手睇檔，更有落手整嘢食嘅經驗。講到癮起，佢仲即場落手整雞蛋仔，見佢倒蛋漿，已經睇得出功架。佢教路話，蛋漿唔能夠落得太多，否則成品就似蛋糕，會唔夠脆喇。
用唔慣新式工具
不過郭似乎就用唔慣新式工具，搞到畀工總名譽會長鍾志平笑佢漏晒啲蛋漿。郭就話係因為明火同電爐有分別，而且所用嘅模具夾唔實喎，而佢仲即刻發揮工業家頭腦，建議安裝彈弓去解決問題添。