政情：放寬海外醫生實習遭否決 議員圍攻醫委會
香港醫護人手嚴重不足，病人輪候公營醫院服務更加係等完又等，要輪候好耐先至睇到醫生。最近醫務委員會就商討放寬非本地培訓嘅專科醫生實習安排，不過有關方案就喺醫委會會議上被否決，事件唔單止喺醫學界受到爭議，就連立法會議員都睇唔過眼。尋日就喺立法會內務委員會會議商討相關議程時鬧爆，又質疑本地醫生存在「極端保護主義」、業界「醫醫相衞」等，紛紛要求喺立法會大會上休會辯論事件。搞到四圍都畀人鬧，醫委會真係要睇吓點收科喇。
醫委會早前否決咗有關放寬海外醫生實習嘅方案後，連日嚟都受到各界炮轟。飲食界立法會議員張宇人（Tommy）日前仲去信內會尋求內會同意，喺下月立法會大會上提出休會辯論討論事件。佢話知道唔少議員都有意見，希望可以畀議員喺大會發表意見，而佢都覺得放寬海外醫生嚟香港，可以解決香港醫療服務面對嘅燃眉之急。
醫護人手不足 葉劉扯火
Tommy今次嘅議案獲得跨黨派支持，民主派嘅議員陳志全仲鬧爆本地醫生存在「極端保護主義」，議員黃碧雲都話好關心公營醫療機構嘅情況，認為即使醫委會將再開會討論事件，立法會嘅辯論都有價值。而建制派嘅議員葛珮帆就話，市民對醫委會嘅決定感到失望，甚至憤怒，有關決定仲令唔少市民投訴佢哋「醫醫相衞」。同Tommy一樣都係行政會議成員嘅議員葉劉淑儀，就形容醫療問題係本港「第四座大山」，仲話唔止公營醫療系統爆煲，就連私家醫院都唔夠醫生護士，擔心喺推出自願醫療保險計劃後，市民對私家醫院需求更大，認為醫療人手不足問題已經刻不容緩。
醫委會補鑊 下月再表決
面對社會各方批評，醫委會都急急「補鑊」。原本醫委會會議常規有規定六個月內唔可以就同一議題再表決，但醫委會主席劉允怡日前已發聲明話會提出動議，喺下月八日醫委會政策會議上再討論事件同再表決。多個醫生專業協會昨晚再討論放寬非本地培訓醫生實習要求，與會人士透露，會上共識咗一個比之前更佳嘅建議，讓海外醫生喺不同地方入職，所需年期就有不同，重點在於臨床經驗，具體方案會喺醫委會下月八日會議前提交。
雖然話醫生要有專業自主，但如凌駕大眾利益，難免會被議員同公眾炮轟，不過一眾醫委會委員聽唔聽得入耳就要拭目以待喇！