中環出更：法委會選副主席 擺陳恒鑌上枱
立法會《二○一九年選舉法例（雜項修訂）條例草案》委員會尋日首次開會，並要選出法案委員會正、副主席，喺副主席選舉期間就發生小插曲，原本只係就副主席參選人提出和議嘅立法會議員陳恒鑌（Ben）無啦啦變咗做候選人，「被擺上枱」，到底發生咩事呢？
尋日會議一開始就先選舉主席，身兼行政會議成員嘅議員張國鈞以十四票對五票擊敗民主派議員朱凱廸當選。到副主席選舉時，民主派同樣提名朱參選，而建制派方面就由漁農界議員何俊賢（高佬賢）提名勞工界議員陸頌雄競逐副主席，當時Ben就和議對陸嘅提名。
和議人變候選人
不過秘書處職員派緊選票時，議員劉國勳就發現會議室屏幕上副主席其中一個候選人嘅名變咗做Ben個名，大問︰「點解變咗陳恒鑌嘅？」，仲一邊講一邊拍坐喺隔籬嘅Ben。Ben見狀後即刻指住陸話︰「我係和議」，示意秘書處更正。
在座其他議員見到擺烏龍都忍唔住笑，高佬賢仲講笑話Ben「被擺上枱」，認真搞笑。而最後陸同樣以十四票對五票撼贏朱，成為副主席。
卓妮