中環出更：澡堂百男沖涼李浩然話夠坦蕩
近年愈來愈多學生到內地同台灣升學，喺人生地不熟嘅他鄉既要兼顧學業，又要適應生活文化差異，都唔係一件簡單嘅事。早前喺學友社成立七十周年晚宴上，主席李浩然（Simon）講起呢個話題，佢話自己當年去北京清華大學讀博士班時，喺適應上都面對唔少困難，例如數以百計嘅男人喺澡堂坦蕩蕩咁玉帛相見，嗰時真係唔慣都要慣咁話。
Simon話當時大約係廿年前，佢住嘅宿舍係八個人一間房，冇獨立浴室，沖涼就要去澡堂，個個光溜溜咁行嚟行去，真係可以用「浩蕩」來形容。雖然諗起都覺得難為情，不過佢笑稱，玉帛相見之後，大家嘅感情又真係好啲喎。
佢又話，學友社過去幾十年一直擔負補充教育角色，包括免費補習、放榜輔導等。今年六月將進一步成立大中華區升學及發展輔導中心，希望提供更多資訊畀有意喺當地升學嘅學生，等學生唔使好似佢當年去內地讀書時咁措手不及。
同場仲有考試及評核局秘書長蘇國生，同埋該局前任秘書長、現已過檔香港公開大學做副校長嘅唐創時。唐話，香港升學渠道確實唔夠，但愈來愈多人想讀大學，所以學友社扮演嘅角色確係香港好需要嘅。
晏紫做虎媽 睇住4仔女
東華三院總理、網球好手晏紫都有到場，事關佢有份贊助支持學友社。講起升學經歷，佢就笑笑口話因為自細打網球，行嘅係與別不同嘅成長路，所以冇經歷過特別徬徨嘅升學歲月，反而依家喺屋企負責睇住四名子女讀書，佢就扮演嚴厲嘅角色，形容自己同虎媽差唔多咁話。
卓妮