政情：公民講場：康文署廢招代修例 黃牛黨笑你太天真

康文署日前就話會調整內部認購同公開售票嘅比例，由八二比改為七三比。康文署諗住多咗啲飛公開發售就可以打擊黃牛飛炒賣問題，睇嚟署長李美嫦嘅諗法太天真，有立法會議員話業界已將公開發售嘅比例增至四成，但係都打擊唔到黃牛飛，而新措施亦唔能夠打擊網絡炒賣，質疑修例工作仲要拖。嗱！一矢中的嘞！一日打擊唔到網絡炒賣，都冇可能趕絕黃牛飛，李美嫦都係畀啲黃牛黨牽住走。