政情：青年宿舍完工無期 等到老年先住得？
政府喺八年前提出嘅青年宿舍計劃，至今仍未有任何宿位供應。根據民政事務局（民政局）回覆立法會議員嘅書面問題，首個青年宿舍項目完工日期又再延遲，另外，有四個項目至今仍未有完工日期。真係青年變老年都唔知有冇得住呀！
大埔項目多次延期
首個位於大埔嘅青年宿舍項目有八十個宿位，曾經預計喺一八年中落成，點知多次延期，舊年四月原本仲預計喺今年首季完工，點知民政局嘅最新回覆係預計今年第三季才完工，即係延期逾一年。
此外，當局嘅答覆顯示，仲有四個青年宿舍項目，完工日期仍然係「待定」，真係令人懷疑呢啲項目仲存唔存在。另外仲有一個位於元朗嘅項目，預計完工日期係二○二一年第三季。全部項目加埋一共得二千八百個宿位，完工日期又延期又「待定」，有生之年要住得到青年宿舍，隨時難過中六合彩！