政情：蔣麗苑北上遇風度男 讚中港文化差異減
近年唔少人講中港矛盾，但亦有唔少港人北上發展，好似立法會議員蔣麗芸細妹、航空發展與機場三跑道系統諮詢委員會成員蔣麗苑，都頻繁往返中港廿多年，佢就感受到兩地文化漸漸收窄。
蔣麗苑尋日出席論壇分享，話近年去內地二線城市時，竟然會有男士幫手開門，搭(車立)亦會幫忙撳住開門掣等埋佢，大讚有關行徑夠風度，係以前唔會發生嘅事，有人聽到即刻話因為佢靚，但佢就覺得唔係，而係文化水平提升。
強調需親身感受
講到唔少香港人對內地人貼上負面標籤，佢就話早排睇過本書，話人對事物嘅睇法受以往讀書時印象所影響，所以先有必要親身去感受同了解囉！不過，佢都話初期返內地發展時，的確感受到兩地差異，但就算有困難，佢都明白喺內地發展得着點都會大得多，因為世事唔會兩全其美咁話。