政情：何廸夫推廣棒球 場地少頻碰壁
隨住明星運動員不時揚威國際，近年香港體育運動有抬頭之勢，但棒球仍然係冷門項目。經常熱衷於做青年工作嘅廣東青年總會常董何廸夫（Dave）最近擔任香港棒球總會秘書長，自然要瞓身推廣，佢慨嘆因為場地不足，令家長同學校對棒球認識唔多，搞到經常碰壁添！
Dave話棒球係一種全面性運動，唔單止可以增強體格、訓練判斷能力，仲可以鍛煉團隊精神。棒球在日本、台灣同韓國好盛行，但係喺香港就好少本地人參與，就算棒總係受政府資助的體育總會之一，但係知名度同足總真係冇得比。
校方驚學生揮棒搞破壞
佢話試過去學校推廣，希望將棒球加入課程選項之一，但係校方多數耍手擰頭，有啲老師就驚學生亂咁揮棒搞破壞喎。雖然推廣不易，但佢都仲睇好前景，因為依家喺香港，有台灣同日本人嘅小朋友學打之外，都有愈嚟愈多本地家長想畀小朋友學啲冇咁大路嘅體育運動。遲啲棒總將搞一個棒球嘉年華，希望吸引市民對棒球嘅關注，令棒球更加普及化。