政情：預算案接波宣傳片 使咗24萬
新一份財政預算案「減甜」，加上盈餘減少，仲要有赤字預算，搞到市民都唔多順氣，原來財政司司長陳茂波（波叔）攞住個波，話畀人聽邊度有得派預算案嗰條宣傳短片同宣傳聲帶，製作費花咗廿四萬元。呢份「減甜」預算案，市民都未必想攞，派發地點隨時唔知好過知啦！
政府新聞處（新聞處）回覆立法會財務委員會特別會議嘅問題時，透露二○一九至二○二○年度財政預算案派發地點嘅宣傳片，以一條電視宣傳短片及一條電台宣傳聲帶計，製作費用係廿四萬元，播放日期係二月十八日至廿六日，即共九日。對上一個年度預算案派發地點嘅宣傳短片同宣傳聲帶，製作費用就用咗約三十四萬元，今年用少咗錢，唔知係咪知盈餘少，要慳啲使呢？
新聞處宣傳片 三年耗逾888萬
新聞處又話，由二○一六年至今年，截至今年三月初，新聞處一共製作咗廿三套電視宣傳短片及電台宣傳聲帶，總開支逾八百八十八萬元，多數都係宣傳施政報告同財政預算案。