中環出更：怕做「旅遊局長」 楊潤雄外訪多即日來回
問責官員間唔中都要外訪，但好似教育局前局長吳克儉咁，任內五年外訪次數多達五、六十次，被外界揶揄為「旅遊局長」。可能前車可鑑，現任教育局局長楊潤雄嘅外訪次數大幅減少，根據教育局提交立法會財務委員會特別會議嘅文件顯示，楊潤雄上任以嚟只係去咗十次外訪，當中五次仲係即日來回，唔通佢怕畀人笑係「旅遊局長」？
最平上廣州 唔使一千蚊
喺十次嘅外訪中，最遠嘅係去英國，其餘九次都係去內地。由於外訪次數少，所花費嘅公帑亦較少，撇除一次外訪由政制及內地事務局負責費用，其餘九次總共用咗約三十萬元，當中最貴嘅係舊年一月嘅英國外訪，足足用咗約二十萬元，至於其他外訪，即日來回嘅多數都唔使三千元就搞掂，最平嘅係舊年十二月去廣州，只係用咗九百七十二元。相比之下，吳克儉五年外訪用咗逾三百萬港元，楊做咗近兩年先三十萬元，算係慳家喇！
唔單止吳克儉外訪多過楊潤雄，就連教育局副局長蔡若蓮都去得多過楊，蔡上任以嚟總共十二次外訪，多數都冇隨行官員，所以開支總數比楊少，只係用咗二十四萬元多啲。唔知係楊本身唔鍾意外訪定係有心推晒啲外訪畀蔡，等自己唔使做「旅遊局長」呢？
卓妮